شێعر: مامۆستا سەعید عبادەتیان بانان که‌ڵهور
وینه گر: دکتر کیخسرو بابایی
چەوەڕی ڕادە داڵاهوو
==========
دڵم بێاوانێگ تەنیاس
پڕ لە وێرانیەیل واس
ئەتر شەوەارەگان یاس
چەوەڕی ڕادە داڵاهوو
ت دەرد بێ دەرمانمی
هەم مەڵهەمی، هەم ژانمی
سوومای چەوەیلەگانمی
چەوەڕی ڕادە داڵاهوو
ساز دەسم حەیراندە
جەسەم بەن‌بەن وێرانده
دیدەم، وادەی سێرانده
چەوەڕی ڕادە داڵاهوو
لە هجراند بەنەیل بان
لە لیم سووز سەرتەز توان
ڕێوار ڕییەگەی کەشکەشان
چەوەڕی ڕادە داڵاهوو
پەپوو خوەش‌جەماڵ هاتەوە
شەیدا و سووک‌باڵ هاتەوە
ڕەنگین و پڕخاڵ هاتەوە
چەوەڕی ڕادە داڵاهوو
کۊەیل کیشانه تووڕ کەو
چەقی چەقاڵەی چەو لە خەو
نەرگس سۊەرمێ دایە لە چەو
چەوەڕی ڕادە داڵاهوو
کەیکوو چەنی نەخش ها چووێ!
شەوبوو چەنێ خوەشه بووێ!
لەو لاو چەنێ تەرکە لووێ!
چەوەڕی ڕادە داڵاهوو
شنەی وای شەمال هاتەوە
شوان وە شمشاڵ هاتەوە
کووچ کوردەماڵ هاتەوە
چەوەڕێ ڕاده داڵاهوو
هیچ نظری موجود نیست:
ارسال یک نظر